पेरिस, १५ जेठ । फ्रान्सको ब्रिटनी क्षेत्रको फौजदारी अदालतले बुधबार एक पूर्व डाक्टरलाई २ सय ९९ बालबालिकालाई यौन दुर्व्यवहार र बलात्कार गरेको अभियोगमा दोषी ठहर गरेको छ ।
यस आरोपित डाक्टरलाई २० वर्षको जेल सजाय सुनाइएको छ । फ्रान्सको इतिहासमा बालबालिकाको यौन शोषणको यो सबैभन्दा ठूलो घटना हो । यस मुद्दाको सुनुवाई फेब्रुअरी २०२५ देखि चलिरहेको थियो।
आरोपित ७४ वर्षीय डा जोएल ले स्कर्नेक यसअघि ग्यास्ट्रिक सर्जन थिए। उनले सन् १९८९ देखि २०१४ सम्म फ्रान्सका नौवटा क्लिनिक र अस्पतालमा काम गर्दा सयौं बालबालिकालाई यौन दुव्र्यवहार र बलात्कार गरेका थिए।यो खबर बाहिर आएपछि २ जना पीडितले तनावका कारण आत्महत्या गरेका थिए।
जब यी घटनाहरू भए, धेरै पीडितहरू बेहोश वा औषधिको प्रभावमा, शल्यक्रियाबाट निको भएका थिए। त्यही भएर उनलाई केही याद भएन । आरोपितले पहिलो पटक सन् १९८५ मा आफ्नी ५ वर्षीया भान्जीलाई यौन दुर्व्यवहार गरेका थिए ।
आरोपित डाक्टर आफ्ना दुई भतिजीसहित चार बालबालिकालाई बलात्कार गरेको अभियोगमा १५ वर्षको जेल सजाय काटिरहेका छन् । उनलाई सन् २०२० मा यही मुद्दामा सजाय सुनाइएको थियो ।
सन् २०१७ मा प्रहरीले लेस स्कर्नेकको घरमा खानतलासी गर्दा छिमेकमा बस्ने ६ वर्षीया बालिकाको अगाडि अश्लिल गतिविधि गरेको भन्दै यो सम्पूर्ण कुरा बाहिर आएको थियो । बालिकाका अभिभावकले यस विषयमा उजुरी दिएका थिए ।
प्रहरीले उनको घरमा यौन खेलौना र पुतली, कम्प्यूटर र दुई दर्जनभन्दा बढी हार्ड ड्राइभले भरिएका बालबालिकाको यौन शोषणको तस्बिरसहितको बाकस फेला पारेको थियो।
यससँगै उनको सयौं पृष्ठको डायरी पनि फेला परेको छ । यसमा उनले बालबालिकाको यौन शोषणको विवरण लेखेका थिए । दुई स्प्रेडसिटहरूमा पीडितहरूको नाम, उमेर, ठेगाना र उनीहरूको दुर्व्यवहारको हदको बारेमा जानकारी समावेश थियो।
समाचार 
