ललितपुर । नेपाल राष्ट्रिय मण्डली संगति, नेपाल ख्रीष्टियन समाज र राष्ट्रिय ख्रीष्टियन महासंघबीच मेलमिलाप, सहकार्य र एकताका लागि ७ बुदेँ सहमति पत्रमा हस्ताक्षर भएको छ ।

ललितपुरको सानेपास्थित आराधना मण्डलीमा आयोजित घोषणा कार्यक्रममा नेपाल राष्ट्रिय मण्डली संगतिका अध्यक्ष रेभ. हनोक तामाङ, महासचिव पा. शेर बहादुर ए.सी., नेपाल ख्रीष्टियन समाजका अध्यक्ष रेभ. जोसेफ श्रेष्ठ, महासचिव डिल्लीराम पौडेल, र राष्ट्रिय ख्रीष्टियन महासंघका अध्यक्ष सी.बी. गहतराज, महासचिव चित्र रेखा ओझा र तिनै संस्थाका प्रतिनिधिहरुले सहमति पत्रमा हस्ताक्षर गरेका हुन् ।

घोषणा कार्यक्रममा एन.सी.एफ नेपालका अध्यक्ष तथा कार्यक्रमका सभापति रेभ. तामाङले ख्रीष्टियन समुदायलाई संविधानमा पनि विभेद गरिएको बताएका छन् । स्वभावमा र विचारमा रुपान्तरण आएमात्र देशमा परिवर्तन हुने बताउँदै अध्यक्ष तामाङले हालसम्म ख्रीष्टियनको पक्षमा बोल्दिने कुनै राजनीतिक पार्टी नभएकोले अब सदनमा ख्रीष्टियन समदायबाट प्रतिनिधित्व गर्ने संसदहरु पठाउनुपर्ने बताएका हुन् ।

सहमति पत्रमा भनिएको छ, ‘बाहिरबाट हेर्दा धेरै उपलब्धिहरू प्राप्त भएको जस्तो देखिए तापनि आजसम्म पनि नेपाली ख्रीष्टियन समुदाय तथा चर्चहरूका समस्याहरू यथावत नै रहेका, सरकार तथा सम्बन्धित निकायले अझै ख्रीष्टियन समुदायलाई खासै पहिचान नगरेको र सरकारी मान्यता नदिएका हुनाले आफ्नो पहिचान तथा अस्तित्वका लागि बोल्ने, बहस–पैरवी गर्ने र आफ्नो हकहितका लागि विभिन्न मागहरू जाहेर गर्नुपर्ने अवस्था अझै पनि छ । विभिन्न शुभचिन्तकहरू सिङ्गो ख्रीष्टियन समुदायबाट तीनै छाता संगठन अर्थात् एन.सी.एफ.एन., एन.सी.एस. र एफ.एन.सी.एन. मिलेर संयुक्त रूपमा काम गर्नुपर्ने र एकतावद्ध हुनुपर्ने जस्ता माग आएका हुनाले आगामी दिनहरूमा हामी तीनै समूह मिलेर सम्पूर्ण नेपाली ख्रीष्टियन समुदाय र चर्चका हकहितका लागि काम गर्न निम्नानुसारका बुँदाहरूमा सहमति गर्दर्छौ” । ’

१. सबैले एकअर्काको अस्तित्व र पहिचानलाई स्वीकार गरी मान–सम्मान प्रदान गर्ने ।
२. सबैले आ–आफ्ना लक्ष्य–उद्देश्यहरू एकअर्कालाई जानकारी गराउन एक कार्यदल गठन गर्ने र के-के कामहरू कसरी गर्ने भनी कार्य–क्षेत्रहरू निर्धारण गर्ने ।
३. ख्रीष्टियन समुदायका स्थानीय, राष्ट्रिय तथा अन्तर्राष्ट्रिय मुद्दाहरूमा सबैको एक साझा अवधारणा बनाउने र त्यसका लागि मिलेर काम गर्ने ।
५. चर्चको सार्वभौमिकतामा आँच आउने कुनै प्रकारका कुराहरू नगर्ने र स्थानीय चर्च वा सम्प्रदायका नीति–नियम र शिक्षा–सिद्धान्तमा कुनै हस्तक्षेप नगर्ने ।
४. जुनसुकै सम्प्रदाय, समूह र झुण्डसँग सम्बन्धित चर्च वा संघ–संस्थाले आवश्यकताअनुसार साथ÷सहयोग मागेमा मिलेर सहायता गर्ने ।
६. सबैले देशको नीति–नियम पूर्ण–रूपमा पालन गर्ने र कहीँ कतै नेपाली ख्रीष्टियनहरूको प्रतिनिधित्व गर्नुपर्दा मर्यादित भएर प्रस्तुत हुने ।
७. नेपाल राष्ट्रिय मण्डली सङ्गति, नेपाल ख्रीष्टियन समाज र राष्ट्रिय ख्रीष्टियन महासंघ नेपालले प्रत्यक्ष–रूपमा कुनै राजनीतिक गतिविधिमा संलग्नता नजनाउने ।

नेपालमा एन.सी.एफ. ले चर्च र आत्मिक क्षेत्रमा र नेपालका प्रत्येक इसाईको धार्मिक विश्वास, भक्ति, नैतिकता र इमानदारिताको रक्षार्थ धार्मिक हकहित, धार्मिक स्वतन्त्रता तथा मानवअधिकारका निम्ति संयुक्त आवाज बनी सो प्राप्तिका लागि क्रियाशिल रहने भनेर सन् १९९६ मा “नेपाल ख्रीष्टियन समाज” को स्थापना गरिएको थियो भने, नयाँ संविधानमा ख्रीष्टियन सुझाव समितिले आफ्नो कार्य सम्पन्न गरिसकेपछि सोही समितिमा रहेका कति जना र इसाई महासंघ नेपालसँग सम्बन्धित केही व्यक्तिहरू मिलेर “राष्ट्रिय ख्रीष्टियन महासंघ नेपाल” नामको अर्को एक संस्था सुरु गरिएको थियो, जसले ख्रीष्टियनहरूका हकहितका लागि सरकार तथा सम्बन्धित निकायहरूसँग बहस–पैरवी गर्नुका साथै विभिन्न मागहरू राख्ने कामहरू ग-यो र आजसम्म पनि आफ्नो लक्ष्य–उद्देश्यअनुसार निरन्तर काम गरिरहेको छ ।

आ–आफ्नो उद्देश्यअनुसारका कार्यहरू कहिले मिलेर त, कहिले आ–आफ्नै तरिकाले काम गर्दै आइरहेका नेपाल राष्ट्रिय मण्डली संगति, नेपाल ख्रीष्टियन समाज र राष्ट्रिय ख्रीष्टियन महासंघबीच मेलमिलाप, सहकार्य र एकताका लागि विभिन्न चरणमा वार्ता भईरहेको थियो । सन् २०१७ मा क्वाईनोनिया पाटन मण्डलीमा तीनै संस्थाका प्रतिनिधिहरुबीच भएको बार्ता असफल भएपश्चात २०१८ मा सम्पन्न एनसीएसको महासभामा एन.सी.एफ र एनसीएसबीच १० बुँदै कार्यरत एकता गर्ने सहमती भएसँगै त्यसैअनुरुप एन.सी.एफ र एनसीएसले सँगै मिले कामहरु अगाडी बढाउँदै आइरहेको छ ।

नेपाल राष्ट्रिय मण्डली संगति, नेपाल ख्रीष्टियन समाज र राष्ट्रिय ख्रीष्टियन महासंघबीच मेलमिलाप, सहकार्य र एकताका लागि ७ बुदेँ सहमति पत्र :