निर्मला कुर्मीलाई गृहमन्त्रीको आग्रह : धर्ना छाडेर अनुसन्धानमा सघाउनुस्
उपप्रधान तथा गृहमन्त्री रवि लामिछानेले बाँकेकी निर्मला कुर्मीको न्यायका लागि काठमाडौंको माइतीघरमा चरणबद्ध आन्दोलनमा रहेका पक्षलाई धर्ना छाडेर अनुसन्धानमा सहयोग गर्न आग्रह गरेका छन् ।
सरकार कुर्मीको घटनाबारे संवेदनशील भएको भन्दै उनले नेपाल प्रहरीको केन्द्रीय अनुसन्धान ब्यूरो (सीआईबी)ले विशेष टोली परिचालन गरी छानबिन गरिरहेको जानकारी दिए ।
उनले सबै धर्ना र आन्दोलनका गतिविधि छाडेर प्रहरीको छानबिनमा सहयोग गर्न आग्रह गरेका हुन् ।
आफू मन्त्री भएपछि दुईपटक टेलिफोन गरी धर्नामा रहेकी रुबी खानलाई उनले घटनाबारे सरकार गम्भीर रहेको र दोषी पत्ता लगाउन प्रयास गरिरहेको बताएका थिए ।
यसअघि गत सोमबार गृहमन्त्री लामिछानेले गृह सचिव विनोदप्रकाश सिंह, प्रहरी महानिरीक्षक धीरजप्रताप सिंहलगायत उच्च सुरक्षा अधिकारीसहितको छलफल गरेर प्रहरीको केन्द्रीय अनुसन्धान ब्यूरो (सीआईबी)लाई यस विषयमा सत्यतथ्य छानबिन गरी प्रतिवेदन पेस गर्न निर्देशन दिएका थिए । रासस
समाचार 
