बुटवल । जेनजी आन्दोलनको मौका पारेर कपिलवस्तु कारागारबाट ठुलो सङ्ख्यामा कैदी बन्दीहरू फरार भएका छन्। कारागारमा रहेका कुल ४७० जनामध्ये ३५ जनाबाहेक अन्य कैदी बन्दीहरू भागेको कपिलवस्तुका प्रमुख जिल्ला अधिकारी दिलकुमार तामाङले जानकारी दिए।
आज बिहान ७ बजेतिर कारागारबाट भागेका कैदी बन्दीहरूले नजिकै रहेको कपिलवस्तु जिल्ला अदालतमा समेत तोडफोड र आगजनी गरेका छन्। आगजनीका कारण अदालतका महत्त्वपूर्ण कागजातहरू जलेका छन् भने भवनको संरचना र अन्य उपकरणहरूमा पनि क्षति पुगेको छ।
प्रजिअ तामाङका अनुसार फरार कैदी बन्दीहरूलाई नियन्त्रणमा लिन सुरक्षाकर्मी परिचालन गरिएको छ। अहिलेसम्म २५ जनालाई नियन्त्रणमा लिइएको र अन्यको खोजी कार्य जारी रहेको उनले बताए। यो घटनाले कारागार सुरक्षा व्यवस्थामाथि गम्भीर प्रश्न उठाएको छ।
प्रकाशित : २०८२ भाद्र २५, बुधबार : प्रकाशित
समाचार 
