काठमाडौँ । काठमाडौँ महानगरपालिकाले हालसम्म करिब रु. २३ अर्बभन्दा बढी मूल्य बराबरको २०८ रोपनीभन्दा बढी सार्वजनिक जग्गा फिर्ता ल्याएको जनाएको छ ।
महानगरले अब करिब २ खर्ब रुपैयाँ मूल्य बराबरको १ हजार ८५९ रोपनी १४ आना सार्वजनिक जग्गा पुनः प्राप्त गर्ने लक्ष्य लिएको महानगर प्रमुख बालेन शाहले बताए ।
शाहका अनुसार स्थानीय सरकार सञ्चालन ऐन, २०७४ ले सार्वजनिक सम्पत्ति र जग्गाको संरक्षण, व्यवस्थापन तथा पुनः प्राप्तिको सम्पूर्ण अधिकार स्थानीय सरकारलाई दिएको छ ।
उनले भने,‘हामी निर्वाचित भएको पहिलो दिनदेखि नै सार्वजनिक सम्पत्तिमा जनताको पहुँच वृद्धि गर्ने नीति लिएर काम गरिरहेका छौँ’ ।
सार्वजनिक जग्गा मिच्ने, कब्जा गर्ने र हडप्ने प्रवृत्ति अन्त्य गर्न महानगरले निरन्तर अभियान सञ्चालन गर्दै आएको छ ।
सो अभियानअन्तर्गत फिर्ता गरिएका जग्गाहरूलाई खुला पार्क, खेलकुद मैदान, स्केटबोर्ड पार्क, सत्तल, हरित क्षेत्र र सार्वजनिक स्थलका रूपमा विकास गर्ने कार्य तीव्र गतिमा अघि बढाइरहेको उनले बताए । यसै क्रममा केही खोला कोरिडोरहरूमा रहेका अतिक्रमण पनि हटाइएका छन् ।
सार्वजनिक सम्पत्ति संरक्षण अभियानलाई थप प्रभावकारी बनाउनका लागि पूर्वसचिव रामबहादुर रावलको अध्यक्षतामा गठित आयोगको प्रतिवेदनलाई नीति आधारका रूपमा ग्रहण गर्दै कार्यान्वयन समिति गठन गरिएको छ। समितिले भोलिदेखि नै कार्य प्रारम्भ गर्ने भएको छ ।
उनले भने, ‘यस अभियानको सफलतासँगै हामीले २ खर्ब रुपैयाँभन्दा बढी मूल्य बराबरको सार्वजनिक र सरकारी जग्गा भू–माफियाको कब्जाबाट फिर्ता ल्याउन सक्नेछौँ। तर यो केवल महानगरको प्रयासले सम्भव हुँदैन, सच्चा नागरिकको साथ र आवाजले मात्र सम्भव हुन्छ।’
रावल आयोगले पहिचान गरेका जग्गा मिच्ने व्यक्तिहरूका नाम, ठेगाना, कित्ता नम्बर र मिचिएको क्षेत्रफल सहितको विवरण पनि सार्वजनिक गरिएको छ ।
सो प्रतिवेदनले सहरी क्षेत्रमा रहेका बहुमूल्य सरकारी तथा सार्वजनिक सम्पत्तिहरूको दुरुपयोग समाजका ठुला भनिएका नीति निर्माणकर्ताबाटै भएको स्पष्ट देखाएको छ ।
महानगरले चालु आर्थिक वर्षको नीति, कार्यक्रम र बजेटमा पनि सार्वजनिक सम्पत्ति पुनः प्राप्तिको कार्यलाई प्राथमिकता दिएको छ ।
समाचार 
