सत्तारुढ नेपाली कांग्रेसले रुसलाई युक्रेनसँगको समस्या कूटनीतिक माध्यमबाट समाधान गर्न आग्रह गरेको छ।

रुसले युक्रेनमाथि आक्रमण गरिरहेको अवस्थामा कांग्रेस प्रवक्ता डा. प्रकाशशरण महतले ट्विटरमार्फत रुसलाई युक्रेनसँगको समस्या कूटनीतिक माध्यमबाट समाधान गर्न आग्रह गरेका हुन्।

‘हामी रूसलाई शान्तिपूर्ण र कूटनीतिक माध्यम प्रयोग गर्न आग्रह गर्दछौं,’ उनले लेखेका छन्, ‘यदि कुनै चिन्ता र चासो छ भने कूटनीतिक माध्यमबाट त्यसको समाधान गरियोस्।’

कांग्रेसले रुससँग युक्रेनबाट सेना तत्काल फिर्ता गर्न र थप रक्तपात रोक्न पनि माग गरेको छ।

‘हामी रुसलाई युक्रेनबाट आफ्ना सेना तत्काल फिर्ता गर्न माग गर्छौँ। थप रक्तपात र निर्दाेषको ज्यान लिने काम बन्द गरियोस्,’ प्रवक्ता डा. महतले भनेका छन्, ‘युक्रेनको क्षेत्रीय अखण्डता र सार्वभौमसत्ताको सम्मान गर्नुपर्छ।’

रुसले गत बिहीबारदेखि निरन्तर युक्रेनमाथि आक्रमण गरिरहेको छ।