एमसीसी विरूद्ध आन्दोलनमा उत्रिएका बन्दकर्ताहरूले सुर्खेतस्थित नेकपा एमाले र काँग्रेसको पार्टी कार्यालयमा ढुंगामुढा गरेका छन् । जिल्ला प्रहरी कार्यालय सुर्खेतकाअनुसार कर्णाली प्रदेशको राजधानी वीरेन्द्रनगरमा बन्दकर्ताले नेकपा एमाले र नेपाली काँग्रेसको पार्टी कार्यालयमा पुगेर ढुंगामुढा गरेका हुन् । उक्त ढुंगामुढाबाट कार्यालयको भौतिक सामानमा क्षति समेत पुगेको छ ।

यस्तै,बन्दकर्ताले कार्यालयमा आगो लगाउने प्रयास समेत गरेका छन् । साथै उनीहरूले यस अघि वीरेन्द्रनगरका मुख्य चोक मंगलगढी र यरीचोकमा आन्दोलन गर्दै सुरक्षामा खटिएका प्रहरीमाथि समेत ढुंगामुढा गरेका थिए । प्रहरी र बन्दकर्ताबीच झडप भएपछि नियन्त्रणमा लिन प्रहरीले दुई दर्जन बढी अश्रुग्यास समेम हानेको थियो भने केही बन्दकर्तालाई नियन्त्रणमा समेत लिएको छ ।

विप्लवसहित ६ राजनीतिक दल र दुई मोर्चाले गरेको बन्दका कारण सुर्खेत केही समय तनावग्रस्त बनेको छ भने आन्दोलन नियन्त्रण बाहिर गएको छ ।