म्याग्दी, चैत ८ गते। म्याग्दीको अन्नपूर्ण गाउँपालिकामा पर्ने पर्यटकीय स्थल घोडेपानी पुनहिल क्षेत्रका डाँडापाखा फुलेको लालीगुराँसले छोपिन थालेका छन्। लालीगुराँसले डाँडापाखा रमणीय देखिन थालेपछि आन्तरिक एवम् बाह्य पर्यटकको घोडेपानीमा चहलपहल बढेको छ।

नेपालमा पाइने ३२ मध्ये यहाँ आठ प्रजातिका लालीगुराँस पाइन्छन्। वसन्त ऋतुमा  पाखाभरी ढकमक्क फुल्ले लालीगुराँसले पुनहिल क्षेत्र मनमोहक देखिन्छ।

तीन महिना सुनसान बनेको यो क्षेत्र फागुनको दोस्रो सातादेखि पर्यटकको चहलपहल सुरु भएको छ। दोस्रो मुख्य पर्यटकीय याम सुरु भएसँगै पदयात्राका लागि विश्व प्रसिद्ध अन्नपूर्ण क्षेत्रमा पर्यटकको संख्या वृद्धि हुनथालेको घोडेपानीका होटल व्यवसायी डम्बरबहादुर गर्बुजाले बताउनुभयो।

वैशाखको पहिला सातामा डाँडापाखा लालीगुराँसले अझै ढकमक्क भएर सुन्दर देखिने उहाँले बताउनुभयो। सूर्योदय, हिमश्रृङ्खलाको दृश्य र गुराँसको जंगल अवलोकनका लागि दैनिक एक सयदेखि एक सय ५० जना विदेशी पर्यटक पुनहिल जाने गरेको पुनहिलमा टिकटको  व्यवस्थापन  गर्दै आउनुभएका अमृत पुनले जानकारी दिनुभयो।

घोडेपानीको भ्रमणमा पहिलो पटक आउनुभएका जाजरकोट जिल्लाको बारेकोट गाउँपालिकाका अध्यक्ष बिरबहादुर गिरीले घोडेपानी निकै रमाइलो भएको सुनाउनुभयो।

समुद्री सतहदेखि तीन हजार दुई सय १० मिटर उचाइमा अवस्थित पुनहिल चक्रिय अन्नपूर्ण पदमार्गको उत्कृष्ट पर्यटकीय गन्तव्यको रुपमा परिचित छ। पुनहिलबाट एक दर्जन भन्दा बढी हिमश्रृङ्खला र सूर्योदयको सुन्दर दृष्यको दृश्यावलोकन गर्न पाइन्छ।