नेपाली पर्वतारोही तेञ्जिङ नोर्गे शेर्पाको जीवन कथामा बन्न लागेको फिल्मको विश्वव्यापी अधिकार एप्पलले प्राप्त गरेको छ । हालै सम्पन्न क्यान्निज मार्केटमा यो सम्झौता भएको हो ।

सन् १९५३ मा न्युजिल्यान्डका पर्वतारोही सर एड्मन्ड हिलारीसँगै शेर्पाले पहिलो पटक सफलतापूर्वक सगरमाथाको चुचुराे टेकेका थिए । शेर्पाको जीवन कथामा आधारित फिल्म ओस्कार विजेता सि-सअ फिल्मले निर्माण गर्ने भएको छ । सो फिल्ममा बाफ्टा (BAFTA) मनोनयनमा परेका  कलाकार टम हिडलस्टोन र चार पटक ओस्कार मनोनयनमा परेका विलेम डाफई प्रमुख भूमिकामा खेल्दैछन् । हिडलस्टोनले हिलारीको भूमिका निर्वाह गर्दैछन् ।

अन्तर्राष्ट्रिय सञ्चार माध्यमका अनुसार शेर्पाको भूमिकाका लागि कलाकारको खोजी भइरहेको छ ।

शेर्पाहरूले खराब मौसमका बावजुद पनि कसरी हिमाल आरोहण गर्छन् भन्ने दृश्य समावेश गरिने निर्माता टोलीको भनाइ छ । त्यसबाहेक सगरमाथा आरोहणका क्रममा के-कस्ता परिस्थिति आइपर्छन्, सहयात्री (गाइड)को भूमिका कस्तो हुन्छ लगायतका विषय राखिने छ ।

यस फिल्मको कथा ओस्कारका लागि मनोनित भएका लेखक ल्युक डेभिजले लेख्दैछन् । फिल्मका निर्मातामा लिज वाट्स, इमाइल शेर्मान र इयाएन क्यानिङ रहेका छन् । उनीहरू सि-सअ फिल्म्समा आवद्ध छन् ।

दुई करोड ५० लाख डलरको लागतमा तयार हुने यो फिल्म २०२५ को सुरुवाततिर छायांकन हुने बताइएको छ । फिल्म कहिले सार्वजनिक हुन्छ भन्ने जानकारी बाहिर आइसकेको छैन ।