धनकुटाको भेडेटारमा किरात समुदायले आफ्नो पर्व उभौली साकेलाको अवसरमा सांस्कृतिक कार्यक्रम आयोजना गरेका छन् ।
किरात राई यायोक्ख समिति साँगुरीगढीले उभौली पर्व मनाउन विभिन्न साँस्कृतिक कार्यक्रमको आयोजना गरेको छ ।
धनकुटाको साँगुरीगढी गाउँपालिका–६ स्थित भेडेटारमा आयोजित महोत्सवमा किरात समुदायले आ–आफ्नो कला संस्कृतिका विविध पक्ष झल्काउने ‘झाङ्की’ प्रस्तुत गरेका थिए ।
सांस्कृतिक कार्यक्रमको उद्घाटन गर्दै पूर्वमन्त्री सुदन किरातीले भेडेटारलाई बहुसांस्कृतिक पर्यटन केन्द्रका रुपमा विकास गर्नुपर्ने बताए ।
बहुसांस्कृतिक केन्द्र स्थापना भए ‘चोसोक टाङ्ना’, ‘भूमि पूजा’, ‘हुर्रा नृत्य’, ‘लोसार’ जस्ता चाडपर्वहरू मनाउन भेडेटार उपयुक्त ठाउँ हुने उनले बताए ।
वैशाख पूर्णिमादेखि एक महिनासम्म साकेला नाच्दै उभौली मनाउने चलन छ ।
किरातहरुको धार्मिक ग्रन्थ मुन्धुमका अनुसार समयलाई ‘उधौली’ र ‘उभौली’ गरी दुई भागमा वर्गीकरण गरिएको छ ।
किरात समुदायले यी अवधिहरूलाई खेती चक्रको आधारमा विभाजन गर्छन्।
नेपाली महिना वैशाख वा जेठमा बाली लगाउने बेलामा उभौली पर्व मनाइन्छ भने मंसिर वा पुस जस्ता नेपाली महिनामा बाली काट्दा ‘उधौली’ पर्व मनाइन्छ।
सांस्कृतिक कार्यक्रममा परम्परागत भेषभुषामा सजिएका किरात समुदायका सदस्यहरुले आफ्नो कला संस्कृति झल्काउने साकेला र चण्डी नृत्य प्रस्तुत गरेका थिए ।
समाचार 
